المقادير
اثنين كوب دقيق رشه ملح معلقه كبيره نشا كورن فلور علشان تقرمش واحد معلقه كبيره خميره فوريه واحد معلقه كبيره سكر كوب وربع ماء دافئ
الشربات
اثنين كوب سكر كوب ماء نص ليمونه فانيليا
طرق التحضير:
اول حاجه نعمل الشربات في حله على النار هنحط السكر والميه وعصير الليمونه ونسيبها لحد ما تغلي لما تغلي نهدي النار ونسيبها خمس دقائق وقبل ما نطفي النار نحط الفانيليا ونسيب الشربات يبرد
ندخل على العجينه بقى اولا ننخل الدقيق والملح والنشا نضيف الخميره والسكر وتقلب نضيف كميه الميه اللي في الوصفه تخلط المكونات كويس جدا قوام العجينه بيكون مش تقيل ومش خفيف ويكون فيه مطه خفيفه ثم نغطي العجينه ونسيبها تخمر بعد ما تخمر نحط العجينه في كيس حلواني اكياس استعمال مره واحده تمام ثم نفتحه فتحه يا دوب تنزل كره الزلابيه وهنستخدم المقص بعد دهنه بالزيت في قطع كرات الزلابيه وتقليها في زيت غزير على مرتين اول مره بعد ما تخلص من قلي الكميه كلها ونسيبها تبرد ثم نرجع نحمر الكميه في الزيت مره ثانيه وتقلب لحد ما تاخذ لون دهبي ثم نشيلها من الزيت وننزلها على طول في الشربات البارد او نزينها بصوص الشيكولاته الداره او بيضاء او صوص لوتس او باي صوص تحبيه وممكن نرش عليها سكر بودره بتطلع تحفه .
ملحوظه هامه ..الزلابيه او لقمه القاضي عشان تنجح معاكي وتطلع مقرمشه من بره وطريه من جوه لازم تتقلي على مرتين.
