قبل أي حاجه هتروح قبل المعاد الخاص بطيارتك بساعتين علي الأقل وانت علي بوابة المطار هتلاقي امين شرطة بيسألك علي جواز السفر ( البطاقة لو السفر داخلي ) وتذكرة الطيران في السفر الخارجى. بعد كده هتدخل علي التفتيش ، وهتعدي الشنط علي الجهاز . بعد كده هتروح علي الكاونتر عشان تاخد البوردينج وتشحن شنطك في الطيارة . الشنطة اللي هتطلع معاك علي الطيارة ميكونش فيها سوائل اكتر من ١٠٠ ملي ولا قصافه ولا مقص ولا سكيينه . لو مسافر داخلي هيقابلك امين شرطة هيشوف البوردينج وتروح بعدها علي بوابة الطيارة . لو مسافر دولي هتروح الجوازات ولازم يكون معاك قلم عشان فيه ورقه لازم تملاها قبل ما تدخل علي الظابط . موقفك سليم هتعدي اسمك متشابه مع حد مسجل هتستني شويه مسافر بلد محتاجه تصريح امني لازم يكون معاك مسافر في سن التجنيد هتتسأل عن تصريح السفر بعدها هيقابلك أمين شرطة يتأكد ان الظابط ختم خروج علي الباسبور . بعد كده هتمشي علي السير لغايه رقم البوابة اللي مكتوب في البوردينج وبعد كده هتعدي علي التفتيش قبل ما تركب الطيارة واللي هتقلع فيه الحزام و الجزمه . البوردينج ده مكتوب فيه كمان مكان الكرسي بتاعك علي الطيارة . متنساش تاخد معاك سندوتشات وأنت مسافر عشان أسعار الأكل في المطار غالية . خلي بالك في مطارات السعودية لو وجدوك وحدك بيقولوا لك هنوصلك مجانا دول نصابين ويرجعوا علي شركتك بالفايز…اركب مع الناس أو قطار الحرمين ورحلة سعيدة للجميع.
